[៧៣] ការបិទបាំងទិសខាងជើង (មិត្តអាមាត្យ)
ម្នាលគហបតិបុត្ត មិត្តអាមាត្យជាទិសខាងជើង កុលបុត្តត្រូវប្រតិបត្តិដោយស្ថានទាំងឡាយ ៥ យ៉ាង គឺ៖
១. ទានេន ៖ ដោយការឱ្យរបស់។
២. បេយ្យវជ្ជេន ៖ ដោយការនិយាយតែពាក្យគាប់ចិត្ត។
៣. អត្ថចរិយាយ ៖ ដោយការប្រព្រឹត្តិឱ្យជាប្រយោជន៍។
៤. សមានត្តតាយ ៖ ដោយការប្រព្រឹត្តិខ្លួនស្មើ។
៥. អវិសំវាទនតាយ ៖ ដោយការមិនកុហកបញ្ឆោត។
ម្នាលគហបតិបុត្ត មិត្តអាមាត្យជាទិសខាងជើង ដែលកុលបុត្តប្រតិបត្តិដោយស្ថាន ៥ នេះឯងហើយ រមែងអនុគ្រោះកុលបុត្តដោយស្ថាន ៥ យ៉ាង គឺ៖
១. បមត្តំ រក្ខន្តិ ៖ រក្សាមិត្តដែលធ្វេសប្រហែស។
២. បមត្តស្ស សាបតេយ្យំ រក្ខន្តិ ៖ ជួយថែទាំទ្រព្យសម្បត្តិរបស់មិត្តដែលធ្វេសប្រហែស។
៣. ភីតស្ស សរណំ ហោន្តិ ៖ ជាទីពឹងរបស់មិត្តដែលមានភ័យ។
៤. អាបទាសុ ន វិជហន្តិ ៖ មិនបោះបង់គ្នាក្នុងគ្រាវិបត្តិ។
៥. អបរបជា ចស្ស បដិបូជេន្តិ ៖ រាប់អានរហូតដល់ផៅពង្សរបស់មិត្ត។
ម្នាលគហបតិបុត្ត មិត្តអាមាត្យ ជាទិសខាងជើង ដែលកុលបុត្តប្រតិបត្តិដោយស្ថាន ៥ យ៉ាងនេះឯងហើយ រមែងអនុគ្រោះកុលបុត្តដោយស្ថាន ៥ យ៉ាងនេះ ទិសខាងជើងនុ៎ះ ដែលកុលបុត្តបានបិទបាំងហើយ ជាទិសមានសេចក្តីក្សេម ឥតមានភយន្តរាយយ៉ាងនេះ។
