[៧៤] ការបិទបាំងទិសខាងក្រោម (ទាសៈ និងកម្មករ)
ម្នាលគហបតិបុត្ត ទាសៈ និងកម្មករ ជាទិសខាងក្រោម ចៅហ្វាយនាយត្រូវទំនុកបម្រុងដោយស្ថាន ៥ យ៉ាង គឺ៖
១. យថាពលំ កម្មន្តសំវិធានេន ៖ ដោយការចាត់ចែងការងារសមគួរតាមកម្លាំង។
២. ភត្តវេតនានុប្បទានេន ៖ ដោយការឱ្យនូវភត្តាហារ និងថ្លៃឈ្នួល។
៣. គិលានុបដ្ឋានេន ៖ ការព្យាបាលក្នុងវេលាឈឺថ្កាត់។
៤. អច្ឆរិយានំ រសានំ សំវិភាគេន ៖ ដោយការចែករំលែកនូវរបស់មានរសត្រកាលចម្លែក។
៥. សមយេ វោស្សគ្គេន ៖ ដោយការឱ្យឈប់សម្រាកក្នុងសម័យគួរ។
ម្នាលគហបតិបុត្ត ទាសៈ និងកម្មករជាទិសខាងក្រោម ដែលចៅហ្វាយនាយទំនុកបម្រុងដោយស្ថាន ៥ យ៉ាងហើយ រមែងអនុគ្រោះចៅហ្វាយនាយដោយស្ថាន ៥ យ៉ាង គឺ៖
១. បុព្វុដ្ឋាយិនោ ច ហោន្តិ ៖ ក្រោកឡើងធ្វើការងារមុនចៅហ្វាយនាយ។
២. បច្ឆា និបាតិនោ ច ៖ ឈប់ធ្វើការងារក្រោយចៅហ្វាយនាយ។
៣. ទិន្នាទាយិនោ ច ៖ កាន់យកតែរបស់ដែលចៅហ្វាយនាយឱ្យ។
៤. សុកតកម្មករា ច ៖ ធ្វើការងាររបស់ចៅហ្វាយនាយដោយយកចិត្តទុកដាក់។
៥. កិត្តិវណ្ណហរា ច ៖ នាំកិត្តិគុណរបស់ចៅហ្វាយនាយទៅថ្លែងក្នុងទីនោះៗ។
ម្នាលគហបតិបុត្ត ទាសៈ និងកម្មករជាទិសខាងក្រោម ដែលចៅហ្វាយនាយទំនុកបម្រុងដោយស្ថាន ៥ យ៉ាងនេះឯងហើយ រមែងអនុគ្រោះចៅហ្វាយនាយដោយស្ថាន ៥ យ៉ាងនេះ ទិសខាងក្រោមនុ៎ះ ដែលចៅហ្វាយនាយបានបិទបាំងហើយ ជាទិសមានសេចក្តីក្សេម ឥតមានភយន្តរាយយ៉ាងនេះ។
