ហេតុអ្វីបានជាកិច្ចការពារបេតិកភណ្ឌវប្បធម៌ ជាភារកិច្ចរបស់កូនខ្មែរគ្រប់ៗរូប ?
ការការពារ និងថែរក្សាបេតិកភណ្ឌវប្បធម៌មិនត្រឹមតែជាកាតព្វកិច្ចរបស់ស្ថាប័នរដ្ឋ ឬអ្នកជំនាញពាក់ព័ន្ធប៉ុណ្ណោះទេ ប៉ុន្តែគឺជា ភារកិច្ចដ៏ពិសិដ្ឋរបស់កូនខ្មែរគ្រប់រូប។ មូលហេតុចម្បងៗដែលតម្រូវឱ្យកូនខ្មែរគ្រប់រូបចូលរួមថែរក្សាបេតិកភណ្ឌវប្បធម៌រួមមាន៖
១. បេតិកភណ្ឌគឺជា «ព្រលឹង និងអត្តសញ្ញាណជាតិ»
វប្បធម៌ និងបេតិកភណ្ឌ ដូចជាប្រាសាទបុរាណ ភាសា អក្សរសាស្ត្រ របាំព្រះរាជទ្រព្យ ល្ខោនខោល និងសិល្បៈទស្សនីយភាពផ្សេងៗទៀត គឺជាកញ្ចក់ឆ្លុះបញ្ចាំងពីមុខមាត់ ព្រលឹង និងអត្តសញ្ញាណរបស់ជាតិយើង។ បើគ្មានបេតិកភណ្ឌទាំងនេះទេ ជាតិសាសន៍ខ្មែរយើងនឹងបាត់បង់ភាពជាម្ចាស់លើប្រវត្តិសាស្ត្រ និងឫសគល់របស់ខ្លួន ដែលធ្វើឱ្យយើងរលាយបាត់អត្តសញ្ញាណក្នុងឆាកអន្តរជាតិ។
២. ការតបស្នងសងគុណ និងតេជានុភាពបុព្វបុរស
សមិទ្ធផលបេតិកភណ្ឌដ៏អស្ចារ្យដែលយើងឃើញសព្វថ្ងៃ ជាពិសេសអង្គរវត្ត និងសម្បត្តិវប្បធម៌អរូបីដ៏សម្បូរបែប គឺជាមរតក និងញើសឈាមដែលបន្សល់ទុកដោយបុព្វបុរសខ្មែរជំនាន់មុន។ ការការពារថែរក្សាមរតកទាំងនេះ គឺជាការបង្ហាញនូវភាពកតញ្ញូតាធម៌ ការគោរព និងការតបស្នងសងគុណដល់ការលះបង់ដ៏ធំធេង ហើយបានកសាងកេរ្តិ៍ឈ្មោះល្បីល្បាញដល់ពិភពលោក។
៣. តួនាទីជាអ្នកបន្តវេនក្នុងនាមជាម្ចាស់ផ្ទះនៃមរតក
ក្នុងនាមយើងជាកូនចៅជំនាន់ក្រោយ យើងគឺជាអ្នកទទួលស្គាល់ និងកាន់កាប់បន្តនូវមរតកដ៏មានតម្លៃនេះ។ ប្រសិនបើកូនខ្មែរបច្ចុប្បន្នមិនខ្វល់ខ្វាយ ឬបោះបង់ចោលទេ វប្បធម៌ជាតិអាចនឹងត្រូវបំផ្លិចបំផ្លាញ បាត់បង់ ឬត្រូវគេលួចបន្លំយកទៅធ្វើជាកម្មសិទ្ធិរបស់ប្រទេសដទៃ។ ដូច្នេះ ការការពារគឺជាការការពារកេរមរតកផ្ទាល់ខ្លួនរបស់គ្រួសារជាតិយើងទាំងមូល។
៤. ការជំរុញការអភិវឌ្ឍសេដ្ឋកិច្ច និងទេសចរណ៍
បេតិកភណ្ឌវប្បធម៌គឺជា «មាសស» ដែលទាក់ទាញភ្ញៀវទេសចរជាតិ និងអន្តរជាតិមកកាន់ប្រទេសកម្ពុជា រួមចំណែកយ៉ាងសំខាន់ក្នុងការបង្កើតការងារ ការថែរក្សាបេតិកភណ្ឌឱ្យគង់វង្ស គឺស្មើនឹងការថែរក្សាប្រភពចំណូលដ៏មានស្ថិរភាពសម្រាប់ប្រទេសជាតិ។
៥. តម្លៃសីលធម៌ បេតិកភណ្ឌវប្បធម៌បង្កប់នូវអត្ថន័យអប់រំ ទំនៀមទម្លាប់ប្រពៃណី សេចក្តីថ្លៃថ្នូរ និងសាមគ្គីភាព។ ការយល់ដឹង និងការអនុវត្តតាមតម្លៃវប្បធម៌ជួយឱ្យយុវជនជំនាន់ក្រោយមានសីលធម៌ល្អ រស់នៅមានការគោរពគ្នា និងមានមោទនភាពជាតិខ្ពស់ ដែលជាកម្លាំងចលករដ៏ខ្លាំងក្លាក្នុងការកសាងអភិវឌ្ឍន៍សង្គមជាតិ។
ដូច្នេះការពារបេតិកភណ្ឌវប្បធម៌ គឺ «ការពារជាតិខ្លួនឯង»។ ទឹកដី និងព្រំដែនអាចការពារដោយកម្លាំងកាយ ប៉ុន្តែអត្តសញ្ញាណ និងកិត្តិយសរបស់ជាតិ គឺត្រូវការពារដោយស្មារតីស្នេហាជាតិ និងការចូលរួមយ៉ាងសកម្មពីសំណាក់កូនខ្មែរគ្រប់រូប តាមរយៈការស្រឡាញ់ ការស្វែងយល់ និងការផ្សព្វផ្សាយមរតកដូនតាយើងទៅកាន់ពិភពលោក។
@ចាបចំរើនតុលា
