មេរៀនជីវិតពីព្រះផហង្ករត្ថេរ
ក្នុងអតីតជាតិ ព្រះផហង្ករត្ថេរបានចាប់កំណើតជាជាងឈើ។ កាលនោះ ខណៈពេលដែលកំពុងបំពេញការងារក្នុងព្រៃ លោកបានប្រទះឃើញចេតិយមួយអង្គដែលតម្កល់ព្រះបរមសារីរិកធាតុរបស់ព្រះសម្មាសម្ពុទ្ធព្រះនាម "បទុមុត្តរៈ" កំពុងស្ថិតក្នុងសភាពទ្រុឌទ្រោម និងត្រូវវល្លិព្រៃគ្របដណ្ដប់យ៉ាងជិត។ ដោយសទ្ធាជ្រះថ្លា លោកបានខ្នះខ្នែងសម្អាតចេតិយនោះឱ្យស្អាតបាត រួចថ្វាយបង្គំចំនួន ៨ ដង ហើយដើរថយក្រោយចាកចេញទៅដោយមិនបែរខ្នងដាក់ទីសក្ការៈនោះឡើយ។
ដោយអានុភាពនៃមហាកុសលនេះ លោកបានទៅចាប់កំណើតក្នុងឋានតាវត្តិង្ស និងមានវិមានមាសដ៏ធំស្កឹមស្កៃលេចឡើងជាទីគាប់ចិត្ត។ លោកបានសោយរាជ្យជាព្រះឥន្ទ្រដល់ទៅ ៣០០ ជាតិ និងបានគ្រងរាជ្យជាព្រះចក្រពត្តិរាជចំនួន ២៥ ជាតិ។ លើសពីនេះ រាល់ពេលដែលលោកចាប់កំណើតក្នុងមនុស្សលោក លោកតែងតែទទួលបាននូវផលនៃកុសលនោះយ៉ាងប្រាកដដូចតទៅ៖
បរិបូណ៌ដោយភោគសម្បត្តិ: មានទ្រព្យធនហូរហៀរគ្រប់កាលៈទេសៈមិនខ្វះខាត។
-ធម្មជាតិជួយទំនុកបម្រុង: ទោះបីចូលទៅក្នុងព្រៃស្ងាត់យ៉ាងណាក៏ដោយ ក៏ព្រៃនោះតែងតែប្រែជាទីកន្លែងដែលផ្តល់នូវសេចក្ដីសុខ និងការការពារដល់លោក។
-ផ្លូវដ៏រលូន: ក្នុងព្រៃដែលលោកដំណើរទៅ ផ្លូវតែងតែស្អាតបាត គ្មានគល់ឈើ កំណាត់ឈើ ឬបន្លានានារារាំងឡើយ។
-កាយពលរឹងមាំ: មិនដែលកើតរោគសើស្បែក ឬរោគឃ្លង់ ស្រែង រមាស់ ជំងឺឆ្កួតជ្រូក ឬជំងឺដំបៅផ្សេងៗឡើយ។
-សុខភាពល្អឥតខ្ចោះ: រាងកាយមិនដែលកើតមានដុំសាច់ ឬដុំមហារីកណាមួយឡើយ។
-រស្មីកាយពណ៌មាស: មានរូបសម្បត្តិស្រស់បំព្រង និងមានរស្មីកាយពណ៌ដូចមាស។
-សម្រេចសេចក្ដីប្រាថ្នា: អ្វីៗដែលមិនពេញចិត្តតែងតែឃ្លាតឆ្ងាយ ចំណែកអ្វីដែលប្រាថ្នាតែងតែសម្រេចដោយងាយ។
-សមាធិចិត្តមុតមាំ: ចិត្តរបស់លោកតែងតែមានសភាពនឹងនរ ងាយនឹងចូលដល់ភាពស្ងប់ស្ងាត់ និងសមាធិ។
-និរន្តរភាពនៃសេចក្ដីសុខ: ក្នុងរយៈពេលមួយសែនកប្ប លោកមិនដែលធ្លាក់ទៅក្នុងទុគ្គតិភូមិឡើយ។
ជាទីបំផុត នៅក្នុងគម្ពីរអបទានលេខ ៣៣៦ បានបញ្ជាក់ថា មហាកុសលនេះឯង គឺជាឧបនិស្ស័យដ៏រឹងមាំ ដែលនាំឱ្យលោកសម្រេចនូវសន្តិភាពដ៏ឧត្តម គឺព្រះនិព្វាន។
បកប្រែ និងកែសម្រួលពីស្រីលង្កា
#សមាធិ #Meditation #កម្ពុជា #cambodia #សុខភាពចិត្ត #HunKhamra #Buddhism #International #mentalhealthawarenessmonth
